Oiartzungo Udalak maiatzaren 23ra atzeratu du hondakinak atez ate biltzen hasteko eguna

Azpiegitura guztiak ez daude prest, eta herritarrei zerbitzu osoa eta egokia eskaintzearen mesedetan hartu da erabakia 

Oiartzungo Udala datorren maiatzaren 5ean hastekoa zen hondakinak atez ate biltzen. Aitzitik, azpiegitura arazoak direla eta, hondakinak atez ate jasotzen hasteko eguna maiatzaren 23ra atzeratzea erabaki du. 

Alde batetik, komertzio eta ostalariei banatu beharreko ontziak ez dira garaiz iritsi udalera. Beraz, ez da astirik izan komertzioei kuboak entregatzeko eta atez atekoari buruzko informazio praktikoa guztia behar bezala eta denboraz banatzeko. Bestalde, aportazio zein larrialdi guneak eta garbigunea ez daude prest. 

Oiartzungo Udalak aukera guztiak jarri ditu mahai gainean, eta erabakirik zuzen eta egokiena hondakinak atez ate biltzen hasteko eguna atzeratzea dela deliberatu du. Izan ere, hamabost eguneko epean atez atekoa martxan jartzeko beharrezko azpiegiturak prest egongo dira, eta herritarrei zerbitzu oso eta erosoa emateko aukera izango du. 

Maiatzaren 23a bitarte, azken prestaketa lanak 

Udal langileak eta arduradunak atez atekoa martxan jarri ahal izateko azpiegiturak prest egoteaz arduratuko dira azken hamabost egun hauetan. Herritarrek jada etxean dute atez atekoari buruzko informazio praktiko guztia, eta atez ateko informazio bulegoko teknikariak zalantzak argitzen eta lekuan lekuko arazoak konpontzen jardungo dira. Honez gain, zintzilikailuei buruzko azken proposamenak egiteko eta etxean konpostatzeko izena emateko aukera ere izango da.

 

Etiketa(k): , , , , , , , ,
Saila(k): Berriak

0 iruzkin oraingoz

iruzkina gehitu

  1. Konektatu