Astelehenean hasiko gara kubo marroiak banatzen

Azken txanpan dira atez atekoa martxan jartzeko prestaketa lanak. Datorren maiatzaren 5erako dena prest izateko, azken lanetan dabiltza udal teknikari eta langileak. Horien artean lan garrantzitsuenetako bat etxeetarako kubo marroiak banatzea da.

foto de referencia

Ontzi marroiak hondakin organikoak biltzeko erabiliko dira eta Oiartzungo familia guztiek jasoko dute berea guztiz doan. Papera, ontzi arinak eta errefusa poltsetan, eta beira, lehengo gisan, iglu berdean jasoko denez, kuboa hondar organikoentzako soilik erabiliko da. Ez da ontzirik banatuko materia organikoa ez beste hondakinentzat. 

Kubo marroiak banatzeko garaian, herritar orok atez atekoari buruzko informazio praktiko guztia ere jasoko du. Hondakinen atez ateko bilketak nola funtzionatzen duenari buruzko txostenaz gain, hondakinak egoki sailkatzeko hiztegia, sukaldeko imana eta informazio guztia laburtzen duen karteltxo bat ere banatuko dira.

Kubo marroiak apirilaren 26tik maiatzaren 2ra banatuko dira

Datorren astean banatuko dira kuboak atez ateko informazio bulegoan, auzoz auzo eta Done Eztebe plazan. Lan-egunetan auzoz auzo banatuko dira ontzi marroiak eta asteburuan, berriz, Done Eztebe plazan jaso ahal izango dira. Astelehenetik ostiralera goiz eta arratsaldez jaso ahal izango dira, 09:00tik 13:00ra eta 15:00tik 19:00. Asteburuan, aldiz, goizez izango da horretarako aukera: 10:00tik 14:00ra, alegia.

Herritarrek etxean jasoko dute kuboak banatzeko ordutegi eta egutegiari buruzko informazio guztia. Honez gain, prentsa bidez, bandoekin eta herrian zehar megafoniaz ere emango da guztiaren berri. Webgunea ere horretarako tresna erabilgarria denez, hona hemen jakin beharrekoa:

Kubo banaketaren ordutegia eta egutegia: 

Ordutegia:

Lan-egunetan 09:00-13:00 eta 15:00-19:00

Asteburuan 10:00-14:00 

Egutegia:

Apirilak 26: atez ateko irformazio bulegoan goizez nahiz arratsaldez.

Apirilak 27: goizean, Ergoienen (frontoian). Arratsaldean, Gurutzen (frontoian).

Apirilak 28: goizean, Karrikan (plazan). Arratsaldean, Altzibarren (Klarene plazan).

Apirilak 29: goizean, Iturriotzen (frontoian). Arratsaldean, Ugaldetxon (futbol zelaiko aparkalekuan).

Apirilak 30: goizean, Arraguan (frontoian). Arratsaldean, Elizalden (Done Eztebe plazan).

Maiatzak 1: Done Eztebe plazan.

Maiatzak 2: Done Eztebe plazan. 

Oharrak:

Herritarrek ez dute zertan kuboa beren auzoan hartu. Edonork edozein banaketa-puntutan jaso dezake ontzia. 

Informazio bulegoan apirilaren 26an soilik banatuko dira kuboak. Gainontzeko egunetan auzoetan edo Done Eztebe plazan jaso ahal izango dira.

Etiketa(k): , , , , ,
Saila(k): Berriak

0 iruzkin oraingoz

iruzkina gehitu

  1. Konektatu