Gaur Marian Beitialarrangoitia Hernaniko alkateak prentsaurrekoz jakinarazi duenez, Hernaniko Udala datorren maiatzaren 9an hasiko da hondakinak atez ate jasotzen.

Lehengo uztailan erabaki zuten atez atekoa martxan jartzea eta orduz geroztik atez ateko sistema ezagutarazten eta herritarrekin batera Hernaniko errealitatera doitzen aritu dira. Gaurtik maiatzaren 9ra ere horretan jarraituko dute eta “egun horretarako dena prest izango dugu”.

Hernaniko alkateak azaldu duenez, “atez ateko bilketak ondo funtzionatzen duelako hasiko gara Hernanin hondakinak modu horretan biltzen. Demostratatuta dago, datuak hor daude. Hazkundearen mugak, berotegi efektua eta gure osasuna kontutan hartuta ari gara lanean, ez baitugu beste alde batera begira aritu”.

Bide batez, atzo Xabier Mikel Errekondo Usurbilgo alkateak Gipuzkoako Diputazioari eskatutako moratoriari babesa eman dio. “Bat egiten dugu moratoria eskakizun horrekin. Gipuzkoak aukera hori merezi du eta atez atekoak ere bai”.

Iruzkina gehitu

Errauskailua guztion ahotan bolo-bolo dabilen honetan eta Oiartzungo Udala hondakinak atez ate biltzen hastear dela, José Luis Paulín Seijas medikuak orain 7 urte Oiartzungo osasun arloko ia 50 langilek erraustegiaren aurka sinatutako manifestua berrargitaratu du Berria egunkarian.

Orain zortzi urte Txingudin eraiki nahi izan zen errauskailuaren aurka,Gipuzkoako ia 500 sendagile eta erizainek manifestu bat sinatu zuten. ”Oiartzun ke?”k Oiartzungo errealitatera egokitu zuen eta harrera zabala izan zuen herriko osasun arloko langileen artean. Bere asmoa oiartzuar guztiek manifestu hau eskura izatea da eta gure webguneko “Ikasi: dokumentuak” atalean jarri dugu.

Errauskailuak herritarren osasunerako dakartzan kalteak ezagututa, “Oiartzun ke?”k eta Gipuzkoako Errausketaren Aurkako Plataformak atez atekoaren aldeko apustua egiten dutela dio sendagileak. Izan ere, egiaztatuta dago birziklatze eta berrerabiltze mailarik altuenak lortzen dituen eta osasun zein ingurumenarekiko adeitsua den sistema dela.

Hala ere, Gipuzkoako Administrazioaren asmoen aurka, atez atekoan eredu izateagatik ez ezik erraustegiaren aurka ere borroka egin behar dugula dio. Horregatik, Soriako herri txiki bateko sarreran irakurritako esaldi batekin bukatu nahi izan du bere idatzia: “Bizitza leku arriskutsua da, ez gaizkia egiten duten pertsonengatik, gertaerei eserita begiratzen dietenengatik baizik”

Iruzkin bat

Xabier Mikel Errekondo Usurbilgo alkateak errausketa programa 6 urtez atzeratzea eskatu dio Diputazioari udaletxean eman duen prentsaurrekoan. Gipuzkoako ahaldun nagusi den Markel Olanori “usurbildarrak egiten ari diren lana kontuan hartzeko eta atez ateko bilketari nahiz Gipuzkoa osoari aukera bat emateko” eskatu dio. Errekondoren hitzetan, “onartezina da erraustegia bezalako makro-poiektuetan 400.000 euro, lehengo 67.000 milioi pezeta inguru, gastatzea. Are onartezinagoa, egitasmo horrek herritarren osasunari eta ingurumenari kalte egingo badio”. 

Atez ateko hondakinen bilketak ematen dituen emaitzak frogatu dituzte Usurbilen bertan eta munduko hainbat txokotan. Horregatik, “moratoria atez atekoa Gipuzkoa osora zabaldu ahal izateko eskatzen dut. Orain arteko emaitzek eta esperientziak posible dela erakusten dute eta egun dugun arazoa konpontzeko irtenbidearen aurrean gaude”. Usurbilgo alkatearen iritziz, herritarrak dira arrakastaren giltza eta ez tratamendu finalistak. “Herritarrak dira dugun punta-puntako teknologia, eta ez erraustegia”.

Moratoriaz gain, Errekondok Batzar Nagusietan gaia jorratzeko eskaera egingo duela eta Markel Olano ahaldun nagusiarengana zuzenean joko duela adierazi du.

Iruzkina gehitu

Usurbilgo Ezker Abertzaleak, Aralarrek eta EAJk hiri hondakinen gaineko agiria sinatu dute aste honetan. Testuan adierazten denez, hiru alderdiek herritarren osasuna eta ingurumena ahalik eta gehien zaintzearen aldeko apustua egiten dute. Usurbildarrek egindako lanaz harro daudela eta eta hiri hondakinen kudeaketan ohitura aldaketa sinple batek zer nolako eragina izan dezakeen aipatzen dute. Honetaz guztiaz gain, herri galdeketa egunetan bozka ematera deitu nahi izan dituzte usurbildarrak.

Talde bakoitzeko bozeramaileek sinatu dute agiria: Xabier Mikel Errekondok Ezker Abertzalearen izenean, Lontxo Zubiriak Aralarrenean eta Iñaki Illarramendik EAJren izenean. Irakurri agiri osoa www.noaua.com webgunean.

Oharra: argazki hau www.noaua.com webgunean argitaratu da.

Iruzkina gehitu

Gaurko Urola Kostako Hitza egunkarian azaldu denez, Orio atez ateko hondakinen bilketa sistema aztertzen ari da.

Azaroko udalbatzarrean udalerriko hondakinak ez erretzeko eskaria egin zuten eta mozioaren alde bozkatu zuten EAJ eta PSOE ez beste alderdi guztietako ordezkariek. Orduz geroztik, beste egitasmo batzuen artean,  Usurbilgo esperientzia ezagutzen izan dira hainbat udal ordezkari.

 Leire Zinkunegi ingurumen teknikariak (ANV) azaldu duenez, “gure asmoa atez ateko sistemaren aldeko gehiengoa lortzea da, Orion, eta Gipuzkoa osoan orokorrean, errauste plantarik martxan jar ez dezaten”.

2 iruzkin

Pasa den otsailaren 6an Aralar-ko zinegotzi  eta ordezkariak izan ziren Usurbilen. 25-30 bat lagun bertaratu ziren. Horien artean ziren Eibar, Aretxabaleta, Antzuola, Zarautz eta Orioko zinegotziak, baita Batzar Nagusietako ordezkari den Rebeka Ubera ere.

Oharra: argazki hau www.noaua.com webgunean argitaratua dago.

Iruzkina gehitu

Sidney, Jakarta, Taipei, San Francisco (Kalifornia – AEB), Seattle (AEB), Halifax (Kanada), Boulder (Kolorado – AEB), Ontario (Kanada), Markham (Totonto – Kanada) dira, beste hainbaten artean, mundu osoan zehar beren hondakinak kudeatzeko sistema desberdinak erabiltzen dituztenak. Baliabideak era askotakoak bezain berritzaileak dira, baina denen helburua bat eta bakarra: hondakinak gutxitzea, berrerabiltzea eta ahalik eta gehien birziklatzea.

Iruzkina gehitu

“No a la incineración” webgunean errausketak gure osasunean dituen kalteen gaineko hainbat ikerketa zientifiko ageri dira. Guri oso interesgarriak iruditu zaizkigu eta gure webguneko “ikasi: dokumentuak” atalean ere jarri ditugu, hala nahi duenak eskura izan ditzan.

Iruzkin bat