Martxa onean hasi da kubo banaketa. Goizeko 09:00an hasi da eta jende mordoa etorri da etxerako beren kuboen bila. Eguraldi ederra dugu eta jendea animatu da!

Iruzkina gehitu

Hemen aukera ederra! Datorren apirilaren 28an, eguerdiko 12:00an, elkarrizketa digitala egingo diote Aitor Etxeberria alkateari Oarsoaldeko Hitzan.

Hemen duzue aldez aurretik galderak egiteko aukera. Eta nahi izanez gero, zuzen-zuzenean ere izango duzue horretarako aukera datorren asteazkenean, apirilaren 28an.

Iruzkina gehitu

Azken txanpan dira atez atekoa martxan jartzeko prestaketa lanak. Datorren maiatzaren 5erako dena prest izateko, azken lanetan dabiltza udal teknikari eta langileak. Horien artean lan garrantzitsuenetako bat etxeetarako kubo marroiak banatzea da.

Ontzi marroiak hondakin organikoak biltzeko erabiliko dira eta Oiartzungo familia guztiek jasoko dute berea guztiz doan. Papera, ontzi arinak eta errefusa poltsetan, eta beira, lehengo gisan, iglu berdean jasoko denez, kuboa hondar organikoentzako soilik erabiliko da. Ez da ontzirik banatuko materia organikoa ez beste hondakinentzat. 

Kubo marroiak banatzeko garaian, herritar orok atez atekoari buruzko informazio praktiko guztia ere jasoko du. Hondakinen atez ateko bilketak nola funtzionatzen duenari buruzko txostenaz gain, hondakinak egoki sailkatzeko hiztegia, sukaldeko imana eta informazio guztia laburtzen duen karteltxo bat ere banatuko dira.

Kubo marroiak apirilaren 26tik maiatzaren 2ra banatuko dira

Datorren astean banatuko dira kuboak atez ateko informazio bulegoan, auzoz auzo eta Done Eztebe plazan. Lan-egunetan auzoz auzo banatuko dira ontzi marroiak eta asteburuan, berriz, Done Eztebe plazan jaso ahal izango dira. Astelehenetik ostiralera goiz eta arratsaldez jaso ahal izango dira, 09:00tik 13:00ra eta 15:00tik 19:00. Asteburuan, aldiz, goizez izango da horretarako aukera: 10:00tik 14:00ra, alegia.

Herritarrek etxean jasoko dute kuboak banatzeko ordutegi eta egutegiari buruzko informazio guztia. Honez gain, prentsa bidez, bandoekin eta herrian zehar megafoniaz ere emango da guztiaren berri. Webgunea ere horretarako tresna erabilgarria denez, hona hemen jakin beharrekoa:

Gehiago irakurri

Iruzkina gehitu

Horixe da galdera: zer gertatuko da kaleko zakorrontziekin atez atekoa martxan jartzen denean?

Ez dira Oiartzungo kaleetatik desagertuko, baina egokitu egingo dira hondakinak sailkatuta erraz jasotzeko. Egun, kalean gabiltzanean ez dugu aukerarik horretarako, dena nahastuta botatzen dugu zakarrontzietara eta, beraz, ez dugu bertan botatako hondakinik birziklatzen.

Aitzitik, zakarrontzietara botatzen ditugu hondakin gehienak birziklagarriak dira eta hori horrela egiteko erraztasunak jarriko dira atez atekoa martxan jartzen denean. Etxean ez ezik, kalean ere gauzak ondo egiten saiatu behar dugu.

Iruzkina gehitu

Sanmarko mankomunitateak gaur inauguratu du Garbera merkataritza-gunearen alboko garbigunea.

Etxean sortzen diren hainbat hondakin ezin dira kaleko ohiko kontenedoreetara bota, eta hondakin horiek jaso eta behar bezala kudeatzeko guneak dira garbiguneak.

Garberakoaren kasuan, etxeko obra txikien hondarrak, hondakin arriskutsuak, tamaina handiko tresnak, etxetresna elektrikoak, inausketak, egurra, kristala, jostailuak… eraman ahal izango dira bertara.

Asteartetik larunbatera egongo da irekita honako ordutegian: lan-egunetan 10:00tik 13:00ra eta 15:00tik 20:00ra. Larunbatetan, berriz, 10:00tik 14:00ra eta 16:00tik 20:00ra.

Informazio gehiagorako deitu 943 21 49 77 telefono zenbakira, idatzi mezua garbigunea-donostia@sanmarko.net helbide elektronikora edo bisitatu www.sanmarko.net webgunea.

Oharra: argazki hau www.diariovasco.com webgunean argitaratua dago.

Iruzkina gehitu

Kataluniako TV3 telebista lokalak etxeko konpostari buruzko erreportaia bat bota zuen atzo “Espai Terra” programaren barne. Oso interesgarria da etxean konpostatzen dutenentzat, baita konpostari buruzko informazioa nahi duen ororentzat ere.

Ikusi bideoa

Iruzkina gehitu

Oiartzungo osasun, hezkuntza, kirol, kultura, sindikatu eta nekazaritza munduko hainbat eragilek hondakinen kudeaketa egoki eta eraginkor baten aldeko agerraldia egin zuten ostiralean Done Eztebe plazan, atez atekoa babesten duen agiria irakurrita. 

Egungo hondakinen kudeaketa sistemak goia jo duela ikusita, sortutako arazoari muin-muinetik ekin behar zaiola adierazi zuten. Egungo zabortegien ereduari irtenbidea emateko konpromisoarekin bat egin zuten, eta horretarako beste irizpide guztien gainetik osasunarena lehenesten dutela azaldu zuten. 

Errausketa bezalako tratamendu finalistak azken aukeratzat utziz eta “zero zabor” ekimenak garatzeko asmoarekin bat eginez, Katalunian, Usurbilen eta munduko beste hainbat txokotan martxan den atez ateko hondakinen gaikako bilketa nabarmendu zuten. Amaia Zubiria abeslariak azaldu bezala,  “atez ateko bilketa eraginkorra da, berehalako emaitzak lortzen ditu”. 

Horren guztiaren haritik, bat egin zuten Oiartzungo Udalak hondakinen arazoari irtenbidea ematen hasteko hartu duen bidearekin: hondakinen atez ateko bilketarekin, alegia. “Erronka horri ekiteko eta aukera bat emateko prest gaude. Badakigu denok ikasi egin beharko dugula, baina gure esku dugu guretzat eta gure seme-alabentzat etorkizun oparo eta osasuntsu bat eraikitzeko aukera, eta harro gaude aukera hori eskura izateaz”.

Ikusi agerraldiaren bideoa Oarsoaldeko Hitzaren webgunean

    Gehiago irakurri

Iruzkina gehitu

Oiartzunen bizi diren mediku eta erizainak Usurbilen izan ziren atzo, atez atekoa ezagutzen. Osteguna izaki, Usurbilen hondakin organikoak nola biltzen diren azaldu zieten udal teknikariek. Bisita aprobetxatuz, aportazio- eta emergentzi-guneak ere ezagutu zituzten. Atez atekoak Usurbilen duen funtzionamendu praktikoa ikusi ostean, informazio bulegoko teknikariek herritarrek zer nolako zalantzak dituzten eta zein eskaera egiten dituzten azaldu zieten.

Iruzkina gehitu