Josep María Tost Borrás Riudecanyes-ko alkatea da (CIU) eta baita “Associació de Municipis Catalans per a la Recollida Porta a Porta” elkarteko presidentea ere.

Jarraitu zuzenean hitzaldia 18:30etik aurrera

Iruzkina gehitu

Orain pare bat aste Elizalde Herri Eskolako gurasoekin egin bezala, asteazken arratsaldean Haurtzaro Ikastolako gurasoei ere atez atekoaren berri eman zien Jon eta Ainara teknikariek.

Azalpen orokorraz gain, atez atekoak Oiartzunen izango duen funtzionamenduaz ere hitz egin zuten; maitzaren 5a jada begi bistan baitago!

Bilera bukatutakoan, ikastolan bertan dagoen konposta makina bisitatzeko ere hartu zuten tarte bat.

Iruzkina gehitu

Josep María Tost Borrás-en saioa bihar izango da asteburuan ospatuko diren nazioarteko jardunaldi batzuen baitan.  

Bihar eta etzi “Atez ateko bilketatik Zero Zaborrerako bidean” nazioarteko jardunaldiak ospatuko dira Hernani, Usurbil, Urnieta eta Oiartzunen. Udalerri horietako hainbat eragilek (Hernanin Zero Zabor, Usurbilgo Jarraipen Batzordea, Urnietako Arnasa eta Oiartzungo Agenda21), udalek eta Sanmarko Mankomunitateak antolatu dituzte jardunaldiak. 

Saio horien egitarauaren barne, Josep María Tost Borrás-ek (CIU) hitzaldia eskainiko du bihar, martxoak 26, Oiartzungo udaletxeko pleno aretoan. Arratsaldeko 18:30ean izango da saioa. Tost Borrás Riudecanyes-ko alkatea eta “Associació de Municipis Catalans per a la Recollida Porta a Porta” elkarteko lehendakaria da. 

Riudecanyes Tarragonan dago eta 2000. urteaz geroztik biltzen dituzte beren hondakinak atez ate. Tiana eta Tora udalerriekin batera, Riudecanyes izan zen Katalunian atez atekoa martxan jarri zuen lehen herrietako bat. Orduz geroztik, 150 eta 45.000 biztanle arteko 80 herri kataluniarrek baino gehiagok ekin diote beren hondakinak atez ate biltzeari. Udalerri horien guztien elkarlana errazteko eta hondakinen atez ateko bilketa sistema bultzatzeko asmoz, “Associació de Municipis Catalans per a la Recollida Porta a Porta” elkartea sortu zuten 2002an. Esan bezala, Tost Borrás elkarte horretako lehenkaria ere bada. 

Oiartzungo Agenda21 eta udaletik adierazi dutenez, “herrian atez ateko bilketa maiatzaren 5ean martxan jartzekoa den honetan, hitzaldia oso interesgarria izango delakoan gaude”. Horregatik, oiartzuar guztiak gonbidatu nahi izan dituzte saiora. Jakinarazi dutenez, bertaratzeko aukerarik ez dutenek Oiartzungo atez atekoaren webgunean (www.oiartzunatezte.org) zuzenean jarraitu ahal izango dute hitzaldia.

Gehiago irakurri

Iruzkina gehitu

Oiartzunen materia organikoa konpostatzen dugu eta Lasarte-Orian, itxura denez, bertsoak.

Datorren ostiralerako, martxoak 26, atez atekoaren aldeko eta errauste-plantaren aurkako bertso jaialdia antolatu dute Lasarte-Oriako kultur etxean. “Bertso konposta: herriz herri, atez ate, bertsoz bertso, errausketarik ez!” jaialdia gaueko 22:00an hasiko da.

Iruzkina gehitu

Zubietako errauste-plantaren kaltetu zuzenak, 10 bat laguneko ordezkaritza bat, Hernanin izan ziren atzo arratsaldean atez atekoaren ezarpena eskertu eta errauste-plantaren inguruan duten kezka partitzen. Horietako batzuk errauste-planta jarri nahi duten tokitik 200 eta 400 metrotara bizi dira, eta euren bizimoduari eta osasunari egingo zaion kalteaz oso kezkatuta daude. Atzoko bisitaren arrazoia Hernaniko Udalari euren eskerrona azaltzea izan zen, atez atekoak itxaropena berreskuratzen lagundu dielako. Entregatu duten idatzi osoa irakutzeko….

Gehiago irakurri

Iruzkina gehitu

Oiartzungo Udalak lotuta ditu hondakinak atez ate biltzen hasteko beharrezko azpiegitura guztiak, eta Aitor Etxeberria alkateak gaur eguerdiko agerraldian esan bezala, “datorren maiatzaren 5ean hasiko gara hiri hondakinak atez ate biltzen”. Hurrengo hilabete eta erdian herritarrei ahal bezainbat erraztasun eta informazio praktiko eskura jartzea izango da udalaren helburua. 

Orain bi urte hasi zen gai hau lantzen Oiartzungo Udala, eta pasa den azarotik hona herritarrekin batera gorpuztu du atez atekoak herrian izango duen funtzionamendua. Orain, halaber, “heldu da sistema martxan jartzeko ordua, heldu da hondakinen arazoari egiazko irtenbidea emateko ordua”, adierazi du Etxeberriak. 

Herritarren osasuna eta ingurumena izan dira atez atekoaren aldeko apustua egiteko arrazoi nagusiak, baina egungo hondakinen bilketa nahiz tratamendu sistemak urtero sortzen duen defizit ekonomikoa arintzeko asmoz ere hartu dira erabakiak. Hondakinak atez ate biltzen hastean, sortutako errefusa kantitatea nabarmen murriztuko da Oiartzunen; horretan datza arazo ekonomikoei irtenbidea ematearen gakoa. Bilketa bera garestiagoa izango den arren, errefusaren tratamenduagatik ordaindu beharrekoa nabarmen jaitsiko da, eta birziklagarriak diren materialengatik egungo sistemarekin jasotzen ez dituen diru-sarrerak izango ditu udalak. “Momentuan kostuak zertxobait murriztea lortuko dugu, baina etorkizunean aldea gero eta nabarmenagoa izango da, errefusaren tratamendua gero eta garestiagoa izango baita”, adierazi du Etxeberriak. 

Munduko hainbat herrialdetan, Katalunian eta Usurbilen bertan izandako esperientziek atez atekoa bideragarria dela frogatu dute eta Oiartzunen ere ondo funtzionatuko duela ziurtatu du alkateak; konfiantza osoa du oiartzuarren asmo onean. “Oiartzun zerbitzu onak dituen herria izanik, hondakinen bilketa zerbitzua ere maila berean jartzeko garaia bada. Arazoak besterik ematen ez dituzten kontenedoreak atez atekoa bezalako zerbitzu garbi, eroso eta eraginkor bategatik ordezkatzeko garaia da”. 

Maiatzaren 5etik aurrera beira ez beste hondakin guztiak atez ate jasoko ditu Oiartzungo Udalak. Astelehen eta ostegunetan ontzi arinak bilduko dira; asteartetan papera eta kartoia; asteazken, ostiral eta igandetan materia organikoa eta larunbatetan errefusa. Herritarrek ilunabarreko 20:00tik 22:00ra arteko tartea izango dute beren hondakinak atarira ateratzeko. Honez gain, zerbitzu osoa eta egokia eman ahal izateko, 6 aportazio-gune (landa eremuko bizilagunentzat), emergentzi-gunea eta garbigunea jarriko dira herritarren zerbitzura.

Usurbilgo Ituna 

Oiartzungo Udalak bat egiten du pasa den ostiralean aurkeztu zen Usurbilgo Itunaren edukiarekin. Izan ere, Oiartzunen hondakinen gaiak hartu duen bideak itun horren norabide bera du; norabide berean egiten dute indar biek. Sei urteko moratoria eskaeraren ostean, Usurbilgo Ituna pauso sendo eta arrazoizkoa da. Aitor Etxeberriaren hitzetan, “ pausoz pauso, errausketarik eta zaborrik gabeko arora helduko gara; atez ateko bilketaren arora, alegia”.

Iruzkina gehitu

Gaur eguerdian Usurbilgo Ituna sinatu dute hainbat sindikatu, talde ekologista eta alderdi politikok Donostiako Kursaalean. Itun horretan, erraustegiarentzat 6 urteko moratoriaz gain, zero waste (zero zabor) politika bat jartzeko eskatzen zaie Gipuzkoako Ahaldun Nagusiei. ELA, CCOO, LAB, EHNE, EILAS, HIRU, ESK, Eguzki, Ekologistak Martxan, Greenpeace, Errausketaren aurkako Koordinakundea, Ezker Abertzalea, Aralar, Ezker Batua, Alternatiba eta Berdeak taldeek sinatu dute ituna.

Gehiago irakurri

Iruzkina gehitu

Herritar ugarik eman du izena etxean konposta egiten hasteko, eta aste honetan bertan hasi diren ikastaroak hurrengo martxoaren 26a arte luzatuko dira. Atez ateko informazio bulegoko teknikariak herritarrei deika ari dira, baina oraindik deirik jaso ez duena bulegora bertaratu daiteke ikastaroa noiz egin nahi duen jakinaraztera; telefonoz ere jar daiteke hitzordua 900 49 11 11 doako zenbakira deituta. 

Ikastaroak ordubetekoak dira eta saioa bukatu bezala jasotzen dute herritarrek beren konposta-kaxa. Astelehenetik ostiralera, egunero bi ikastaro egiten ari dira: bata goizean 9:30ean eta bestea ilunabarreko 19:30ean. Bizilagunen eskaerak ikusita, gaztelerazko saio bana ere izango da astero. 

Kanpaina oso arrakastatsua izaten ari da  

Eguberrietatik hona, 430 familiak eman dute etxean konpostatzeko izena. Lehendik 170 familiak autokonpostatzen zutela jakinik, Oiartzunen 600 familia arduratuko dira beren materia organiko guztia beren kabuz kudeatzeaz. Familia horiek guztiek hondakinak murriztu, ongarria sortu eta ingurumenari mesede egingo diote. 

Udaleko ordezkariak oso pozik daude kanpainak izan duen emaitzarekin. Alkateak adierazi duenez, “herrian etxeko konposta egin dezaketen familien erdiaz ari gara hizketan, eta hori emaitza oso ona da. Bide honetatik jarraituz gero, Oiartzun Euskal Herriko herririk konpostatzaileena izatea lortuko dugu. Argi ikusi dugu, baliabideak eskura jarriz gero, herritarrek asmo onez eta gogoz erantzuten dutela”. 

Izena eman duten familia guztiek doako ikastaroa, konposta kaxa eta zazpi hilabeteko aholkularitza teknikoa izango dituzte eskura. Honez gain, datorren urteko hondakinen tasan %20ko hobaria izango dute. Izan ere, Udalak ez du beren hondakin organikoak biltzen eta tratatzen gasturik izango. Hala nahi duena, oraindik izena emateko garaiz da.

Iruzkina gehitu