Urtero legez, heldu da Osasunaren Nazioarteko Eguna: apirilaren 7a. OMEren (Osasunaren Mundu Erakundea) sorrera ospatzearen aitzakian, urtez urtez hainbat aldarrikapen egiten dira munduko hainbat txokotan. 

“Mila hiri, mila bizi” lemapean, aurten, hiriguneko biztanleen osasuna hobetzeko neurriak hartzeko eskaera egin zaie mundu mailako gobernu guztiei. Honez gain, osasungarriak ez diren elikadura-moduen, jarduera fisikorik ezaren eta tabakismoaren aurkako borroka ere bultzatu nahi da. Osasuntsu egotea bizitza emankorra eta zoriontsua izateko beharrezko dela aldarrikatuz, hainbat ekintza izango dira gaurko egunez mundu osoan zehar.

Oiartzunen, aukeran, goiz xamar heldu zaigu egun hau, baina maiatzaren 5etik aurrera egunero-egunero jarriko dugu hondar aletxo bat gure eta gure ondorengoen osasunaren alde.

Iruzkina gehitu

Hainbat alderdi politikok, talde ekologistak eta gehingo sindikalak Usurbilgo Ituna sinatu zuten pasa den martxoaren 12an Donostiako Kursaalean. Sanmarko Mankomunitateko Batzarrak ere bat egin du Itunaren edukiarekin eta 6 urteko luzapena eskatu dio Gipuzkoako Foru Aldundiari, Zubietan egin nahi duen errauste plantarentzat.

“Egungo hondakinen kudeaketak ekarritako arazo larriak herritarren osasuna kaltetu gabe konpontzeko irtenbide osoena hondakinen atez ateko bilketa” dela diote Sanmarko Mankomunitatetik. Horrek ez du esan nahi ordea, ekonomia, ingurumena… kontuan hartzen ez direnik. Honez gain, Itunak Gipuzkoa osoan zero zabor programa ezartzeko eta garatzeko beharra jasotzen duela gogorarazi dute.

Sanmarkoko Mankomunitateak Hernani eta Oiartzungo Udalekin lankidetza hitzarmena sinatu du hondakinen gaikako bilketa bultzatzeko.

Iruzkina gehitu

Izenburu hau jarri dio José Luis Paulín Seijas medikuak azkena idatzi duen iritzi artikuluari. Oiartzun ke?-ko kide ere bada eta bere iritzi artikuluan atez atekoak ez ezik errauste-plantak ere zabortegi bat behar duela dio. Zabortegiaren izaeran dago aldea: atez atekoak inerteen arriskurik gabeko errefusategi bat behar du eta erraustegiak, aldiz, sortutako errautsak pilatzeko zabortegi toxiko bat.

Gehiago irakurri

Iruzkin bat

Asteburuan Usurbil, Hernani, Urnieta eta Oiartzunen “Atez ateko bilketatik zero zaborrerako bidean” nazioarteko jardunaldiak ospatu dira. Kataluniarrak eta italiarrak izan dira hizlariak eta beren bisita ahalik eta gehien aprobetxatu nahi izan dute. Larunbat arratsaldean Haurtzaro Ikastolako konposta makina ikusten izan ziren.

Iruzkina gehitu

Pasa den ostiralean, martxoaren 26an, Josep María Tost Borrás ekonomista kataluniarraren hitzaldia izan zen Oiartzunen. Tost Borrás Riudecanyes-ko alkatea eta Associació de Municipis per a la Recollida Porta a Porta elkarteko lehendakaria da. Asteburuan ospatu diren “Atez ateko bilketatik zero zaborrerako bidean” nazioarteko jardunaldien egitarauaren baitan izan da Oiartzunen. 

Herrian atez ateko bilketa datorren maiatzaren 5ean martxan jartzekoa den honetan, entzule ugari bildu zen pleno aretoan. Josep María Tost-ek azaldu zuenez, “atez atekoaren emaitzak nabarmenak dira eta hondakinak biltzeko sistema honek ez du kolore politikorik. Onartezina da berez ona den sistema bat politizatzea eta udalak higatzeko tresna gisa erabiltzea”. Katalunian ez da horrelakorik gertatu eta beste batzuen artean CIU, PSC, ERC eta ICV alderdietako udalek biltzen dituzte beren hondakinak atez ate. 

“Ez da guk bezainbeste zabor sortu eta hainbeste baliabide hondatzen duen zibilizaziorik” Tost-en iritziz. “Herritarrak burutsuak dira eta berehala hartzen dute hondakinekin dugun arazoaren kontzientzia”. Herritarren partehartzearekin eta borondate politikoarekin, atez ateko bilketak lortzen dituen emaitzak “oso onak eta nabarmenak” dira. Sistema malgua da eta ezaugarri ezberdinak dituzten herrietara egokitzeko aukera ematen du. 

Katalunian ia 100 herrik biltzen dituzte beren hondakinak atez ate 

Riudecanyes-en orain hamar urte hasi ziren beren hondakinak atez ate biltzen eta lehen hamabost egunetan hondakinen %7a birziklatzetik %75a egitera heldu ziren. Emaitza hauek ikusita, “herritarrek burutsu eta arduratsu izatearen harrotasuna berreskuratu dute”. 

Associació de Municipis Catalans per a la Recollida Porta a Porta elkartean egindako lanari esker, egun Kataluniako ia 100 herri txiki nahiz handitako 300.000 biztanlek egiten dute atez atekoa. Hainbat herritan, beren hondakinen %88a bereizita biltzera ere heldu dira eta “interes ekonomikoak besterik ez dituzten errauskailuak ekiditea posible da”, Josep María Tost Borrás-en hitzetan.

Larunbatean, martxoak 27, Hernanin ospatutako mahai inguruan ere izan zen Tost eta hemen ikus daiteke bere hitzaldiaren bideoa.

Iruzkina gehitu

Josep María Tost Borrás Riudecanyes-ko alkatea da (CIU) eta baita “Associació de Municipis Catalans per a la Recollida Porta a Porta” elkarteko presidentea ere.

Jarraitu zuzenean hitzaldia 18:30etik aurrera

Iruzkina gehitu

Orain pare bat aste Elizalde Herri Eskolako gurasoekin egin bezala, asteazken arratsaldean Haurtzaro Ikastolako gurasoei ere atez atekoaren berri eman zien Jon eta Ainara teknikariek.

Azalpen orokorraz gain, atez atekoak Oiartzunen izango duen funtzionamenduaz ere hitz egin zuten; maitzaren 5a jada begi bistan baitago!

Bilera bukatutakoan, ikastolan bertan dagoen konposta makina bisitatzeko ere hartu zuten tarte bat.

Iruzkina gehitu

Josep María Tost Borrás-en saioa bihar izango da asteburuan ospatuko diren nazioarteko jardunaldi batzuen baitan.  

Bihar eta etzi “Atez ateko bilketatik Zero Zaborrerako bidean” nazioarteko jardunaldiak ospatuko dira Hernani, Usurbil, Urnieta eta Oiartzunen. Udalerri horietako hainbat eragilek (Hernanin Zero Zabor, Usurbilgo Jarraipen Batzordea, Urnietako Arnasa eta Oiartzungo Agenda21), udalek eta Sanmarko Mankomunitateak antolatu dituzte jardunaldiak. 

Saio horien egitarauaren barne, Josep María Tost Borrás-ek (CIU) hitzaldia eskainiko du bihar, martxoak 26, Oiartzungo udaletxeko pleno aretoan. Arratsaldeko 18:30ean izango da saioa. Tost Borrás Riudecanyes-ko alkatea eta “Associació de Municipis Catalans per a la Recollida Porta a Porta” elkarteko lehendakaria da. 

Riudecanyes Tarragonan dago eta 2000. urteaz geroztik biltzen dituzte beren hondakinak atez ate. Tiana eta Tora udalerriekin batera, Riudecanyes izan zen Katalunian atez atekoa martxan jarri zuen lehen herrietako bat. Orduz geroztik, 150 eta 45.000 biztanle arteko 80 herri kataluniarrek baino gehiagok ekin diote beren hondakinak atez ate biltzeari. Udalerri horien guztien elkarlana errazteko eta hondakinen atez ateko bilketa sistema bultzatzeko asmoz, “Associació de Municipis Catalans per a la Recollida Porta a Porta” elkartea sortu zuten 2002an. Esan bezala, Tost Borrás elkarte horretako lehenkaria ere bada. 

Oiartzungo Agenda21 eta udaletik adierazi dutenez, “herrian atez ateko bilketa maiatzaren 5ean martxan jartzekoa den honetan, hitzaldia oso interesgarria izango delakoan gaude”. Horregatik, oiartzuar guztiak gonbidatu nahi izan dituzte saiora. Jakinarazi dutenez, bertaratzeko aukerarik ez dutenek Oiartzungo atez atekoaren webgunean (www.oiartzunatezte.org) zuzenean jarraitu ahal izango dute hitzaldia.

Gehiago irakurri

Iruzkina gehitu