Oihan Ostolaza ekonomilari oiartzuarrak atez atekoaren gaineko analisi ekonomikoa egin du Oarsoaldeko Hitzan.

Osasun eta ingurumen ikuspegitik ez ezik, alor ekonomikotik ere atez ateko bilketa bideragarria eta egungo 4 kontenedoreko sistema baino ekonomikoagoa dela ondorioztatu du ekonomilariak.

Gakoa hondakinen bilketan bertan eta sortutako errefusa kantitatean dago. Egia da bilketa nekezagoa dela, hondakinak puntu gehiagotan bildu behar baitira. Gauzak horrela, egungo 4 edukiontzien sistema baino 276.000€ garestiagoa da atez atekoaren bilketa. Hala ere, kontuan izan behar da 5 lanpostu sortuko dituela eta egungo krisi egoeran, ez da berri txarra.

Bilketa bera garestiagoa izango den arren, errefusagatik ordaindu beharrekoa 358.410€ merketuko da. Izan ere, birziklapen-maila igo egingo da eta, beraz, errefusa askoz gutxiago sortuko dugunez, errefusagatik ordaindu beharrekoa ere nabarmen merketuko da.

Oinarrizko bi puntu hauez gain, badira bestelako diru partida batzuk ere. Horien artean daude materia organikoaren tratamendu gastuak (100.000€) eta Oiartzungo Udalak hondakinak birziklatzeagatik jasoko dituen diru sarrerak (102.960€). Kontuan izan behar dugu udalak hondakinen bilketa eta tratamendu eskumenak berreskuratuko dituela eta orain arte jasotzen ez zituen diru-sarrerak jasoko dituela birziklagarriak diren hondakinengatik.

Kontuak ateraz gero, urtero 85.370€ko diferentzia aterako da atez atekoaren alde. Diferentzia honek etorkizunean gora egitea espero da, errefusaren tratamendua gero eta garestiagoa izango baita.

5 edukiontzien sistemaz ere aipua egiten du Ostolazak. Bere hitzetan, ez da atez ateko bilketa baino merkeagoa: bilketa 4 kontenedoreen sistema baino garestiagoa da, materia organikoaren tratamendu gastuak ere baditu, eta, printzipioz, ez du diru-sarrerarik izango eta ez du lanposturik sortuko. Honez gain, sistema honek ez du errauste-planta ekidingo. Atez atekoak lortuko du hori eta horretan datza bi sistema horien diferentzia nagusia.

Oharra: argazki hau www.ekonomiakz.ue webgunean argitaratua dago 

Iruzkina gehitu

El País egunkarian azaldu denez, Bizkaiko Zabalgarbi errauste-plantak 2009an %9ko jaitsiera izan du bere diru-sarreretan. Elektrizitate salmentak ere %12 egin du behera. Gauzak horrela, Zabalgarbik Espainiako Industria Ministeriotik jasotako diru-laguntzei esker bukatu du 2009a txukun xamar.

2008an 337.000 tona hondakin erre zituzten eta 2009an, berriz, 229.000. 2010erako 237.000 tona erre nahi dituzte planta errentagarria izan dadin. Horra hor tranpa! Nola da posible birziklaia, hondakinak gutxitzea… bultzatu eta errauste-planta errentagarri izateko erretzeko zabor gehiago eskatzen ibiltzea?

Oharra: argazki hau www.argia.com webgunean argitaratua dago 

Iruzkina gehitu

Xabier Mikel Errekondo Usurbilgo alkateak asteburuko herri kontsultaren gaineko balorazioak egin ditu. “Herritarren bozken gehiengoa bildu duen atez ateko bilketa sistemak eztabaidari eta hondakinen arazoarekin genuen konponbideari aukera berri bat eskaini dio. Itxaropena dator Gipuzkoara, itxaropena zabortegiak gainditzeko, itxaropena erraustegiarentzat 6 urteko moratoria eskatzeko, itxaropena gauzak ongi egiteko”.

Errekondoren hitzetan, “herri kontsultan izandako partehartze zabalak lortutako emaitzen zilegitasuna indartzen du”. Usurbildarrak prest daude oraingo bidetik jarraitu eta orain arte lortu dituzten emaitza onak hobetu eta mugarri berriak jartzeko. Azken egun hauetan usurbildarrak berak izan badira ere arreta puntua, kontsultak gaia gizarteratzeko balio izan du, eta Errekondoren hitzetan hori da lortu beharrekoa. ”Gipuzkoa osora zabaldu behar den gaia da; ezin da Usurbila mugatu. Orain, erraustegiari buruz duten iritziaz galdetu behar zaie gipuzkoarrei”.

Indarrak ez dituzte erabat akituta nonbait, eta errauste-plantaren gaineko moratoria berresteaz gain, Usurbilgo Ituna prestatzen ari direla azaldu du.

Iruzkina gehitu

Asteburu honetan, atzo eta herenegun, izan dute hiri hondakinen gaineko herri kontsulta Usurbilen eta herritarren gehiengoa atez atekoaren alde azaldu da.

Honakoak izan dira emaitzak: %55,82 atez atekoaren alde, %42,64 5. kontenedorearen alde, %0,75 gaur egun bezala jarraitzearen alde eta botoen %0,78 zuri/nuloak izan dira. Boto kopuruei dagokienean, 1927 usurbildarrek atez atekoaren alde bozkatu dute, 1472k 5. kontenedorearen alde, 26k gaur egun bezala jarraitzearen alde eta 28k zuri edo nulo bozkatu dute. Guztira 3453 herritarrek hartu dute parte herri kontsultan, hau da, bozka eskubidea dutenen %70,23a joan da bozka-mahaietara. Udal hauteskundeetan ere ez da lortu izan horrelako parte hartzerik eta, beraz, esan daiteke herri-kontsultan lortutako emaitzak usurbildarren nahiaren isla garbia direla.

Xabier Mikel Errekondo Usurbilgo alkateak egin zituen publiko emaitzak atzo ilunabarreko 21:15etan eman zuen prentsaurrekoan. Gaur eguerdian zuten egitekoa emaitzen gaineko balorazioa.

Esan bezala, herritarrek beraiek erabaki dute atez atekoarekin aurrera jarraitzea. Kontent daude sistemarekin eta hemendik aurrera ere bideari jarraitzeko gogoz. “Ginda” jarri diote orain arte egindako lanari eta atzetik goazonoi lekzio bat eman digute. Bejondeizuela! Oiartzun aldetik, ESKERRIK ASKO ETA ZORIONAK!

Komunikabideetan ere oihartzun zabala izan du gaur Usurbilgo asteburuko erreferendumak. Hemen duzue balorazioak ezagutu eta norberak bere ondorioak ateratzeko aukera. Noticias de Gipuzkoa, Gara, DV, Berria, EITB, El País eta Noaua-an azaldu da albistea.

Oharra: argazki hau www.noaua.com webgunean argitaratuta dago.

Iruzkina gehitu

Atez ateko bilketak babesa jasotzen jarraitzen du. Aste honetan, Ezker Batuak eta ELA nahiz LAB sindikatuek beren adostasuna azaldu dute sistemarekin. Momentua aprobetxatuz, usurbildarrei asteburu honetan atez atekoaren alde bozkatzeko deia luzatu die. Ezker Batua eta LABeko ordezkariak Usurbilgo esperientzia ezagutzen izan dira egun hauetan.

Oharra: argazki hau www.noaua.com webgunean argitaratuta dago.

Iruzkina gehitu

Aitor Etxeberria alkateak bat egin du errauste-programa 6 urtez atzeratzeko egindako eskariarekin. Xabier Mikel Errekondo Usurbilgo alkateak egin dio moratoria-eskaera Gipuzkoako Foru Aldundiari, eta jada jaso du Hernaniko Udalaren eta errausketaren aurkako plataformen babesa. Hurrengo egun eta asteetan alderdi, sindikatu, gizarte mugimendu eta udal gehiagok moratoria-eskaerarekin bat egitea aurreikusten da. 

Oiartzungo Udala “erabat ados dago Usurbilgo alkateak Foru Aldundiari egin dion eskariarekin, etorkizunerako pauso garrantzitsua baita”. Usurbilgo birziklatze-mailak igo egin dira hondakinak atez ate biltzen hasiz geroztik, eta Hernanik eta Oiartzunek laster ekingo diote bide berari. Etxeberriaren hitzetan, “ahalik eta hondakin gehien birziklatzea da etorkizuneko bidea eta, gaur gaurkoz, atez ateko bilketa da horretarako aukerarik onena. Gainera, errausketa ekiditeko sistema da eta esku-eskura dugu”. 

“Errauste-plantan 400 milioi euro xahutzeak ez du ez hanka ez bururik” Oiartzungo Udalaren iritziz. “Are gutxiago, erraustegia bera eta ekarriko dizkigun osasun eta ingurugiro-arazoak ekiditea posible denean”. Atez atekoa sistema malgua da eta Gipuzkoa osora zabal daiteke. “Horren adibide dira Hernani eta Oiartzun. Hernanik, egitura bertikala eta biztanle asko dituen herri eta hirietan hondakinak atez ate biltzea bideragarria dela frogatuko du. Guk, berriz, herrian etxe bakar asko izanik, etxeko konpostak sistema honetan duen garrantzia berretsiko dugu”. 

Denbora behar da atez atekoa Gipuzkoa osora zabaldu ahal izateko eta “moratoriak, hain justu, horretarako aukera emango digu. Oiartzunen frogatu dugu, baliabideak izanez gero,  herritarrak apustuari ekiteko prest daudela”. Moratoriaren bitartez, “usurbildar, hernaniar eta oiartzuarrentzat; gipuzkoar ororentzat eta atez atekoarentzat aukera bat eskatu nahi dugu”. 

Gehiago irakurri

Iruzkina gehitu

Oraingoan Gipuzkoako talde ekologistak izan dira atez atekoaren alde azaldu direnak. Ekologistak Martxan, Eguzki, Berdeak eta Haritzalde taldeek “atez atekoa Zero Zabor mugimenduaren bidean aurrerapauso egokia” dela adierazi dute. Gauzak horrela, txalotu egin dute Usurbilek jada hartu duen bidea, nahiz Hernani zein Oiartzunen laster abian jarriko dituzten proiektuak.

Honez gain, gure osasunerako eta ingurugiroarentzako kaltegarria izanik “inposatu nahi diguten errauste-plantaren aurrean, aukera bakarra atez atekoa” dela azaldu dute.

Iruzkina gehitu

Atez ateko bilketa, herritarren lana eta kontzientziazioa, errauste-planta, moratoria, herri-kontsulta,… Dena dago lotuta. Xabier Mikel Errekondo Usurbilgo alkatea hari horiekin guztiekin sarea josten saiatu zen pasa den ostiralean Info7 irratian egin zioten elkarrizketan.

Iruzkina gehitu